Libro pri la bestoj

La Libro pri la bestoj estas la sepa parto de la romano Libro pri mirindaĵoj de Ramon Llull. Ĝi estas serioza teorio pri la politiko en formo de fabelo. La intrigo estas malsimpla, sed en ĝi havas apartan lokon la artifikoj de la vulpo por kontroli la politikan potencon, kaj plenumi ĝin el dua loko. La bestojn de la fabelo la aŭtoro ĉerpis el orientaj fontoj.

Verŝajne Llull verkis la libron por la reĝo Filipo la 4-a, kun kiu la aŭtoro havis politikajn kontaktojn dum la verkado. Kaj la celo de la teksto estas helpi regantojn pri la politikaj aferoj. La fabelo havis sian propran historion kaj oni plurfoje eldonis kaj tradukis ĝin aparte. La esperantan tradukon oni povas trovi en formato pdf 1 kaj pdf 2.

Libro pri mirindaĵoj

La libro pri mirindaĵoj (titolo de la originalo: Llibre de meravelles) estis unu el la du grandaj romanoj kiujn verkis Ramon Llull. Temas pri instrua romano kiun Llull verkis dum vizito en Parizo, inter 1287 kaj 1289. La protagonisto, Felikso, estas pilgrimo kiu observas la realon malkovrante kun dolorplena surprizo la distancon inter la homa konduto kaj la Dia ordo de la kreaĵaro.

La vojaĝoj de Felikso proponas itineron tra la enciklopediaj konoj de la 13a jarcento en Eŭropo, tiel ke la 10 partoj de la libro koincidas kun la subjektoj de la Arto de Ramon Llull: Dio, la anĝeloj, la ĉielo, la elementoj, la vegetaĵoj, la mineraloj, la bestoj, la homo, la paradizo kaj la infero. La du unuaj kaj la du lastaj partoj informas pri teologio kaj natura filozofio. La ceteraj traktas pri morala filozofio, kun la centro en la libroj pri la bestoj kaj pri la homoj.

La romano miksas la rakontadon kun la dialogado, tipe de la mezepokaj intrucelaj tekstoj. Preskaŭ ĉio, kio okazas en la romano, reprezentas alion. La majstroj, kiujn renkontas Felikso, klarigas liajn dubojn pere de ekzemploj kaj alegorioj.